دور الأصدقاء في تشكيل الصحة النفسية للمراهقين

دور الأصدقاء في تشكيل الصحة النفسية للمراهقين       بيعيش الإنسان من طفولته لآخر حياته بين رغبة في الاستقلال والشعور الشديد بالولاء لجماعته. وبالتأكيد، تعقيد الحياة الاجتماعية والقيود والنظم والقوانين اللي بتخلي الفرد فى أوقات كتيرة تحت تأثير ضغوطات وصراعات بتدفعه للإقبال الشديد لحد يسمعه، يخفف عنه، ويقف جنبه. فالعلاقات الاجتماعية ومنها الصداقة بإعتبارها من أهم مصادر الدعم الاجتماعى بتشكل درع واقي للفرد من العزلة والاكتئاب والأمراض النفسية، وبالتالى بتحميه من خطر الانحرافات ودا بيزوّد إحساسه بالاطمئنان وهدوء النفس والراحة، وكمان علاقات الصداقة بتساعده أنه يكون شخص فعال في المجتمع.       وعلشان كدا، الرغبة فى الاتصال بالآخرين وتكوين علاقات شخصية قوية حاجة إنسانية أساسية، وبتزيد الرغبة فى الانتماء خصوصًا خلال مرحلة المراهقة؛ لأن المراهقين بيبدأوا يكتشفوا نفسهم ويكتشفوا العالم من حواليهم، وبيقضوا وقت طويل مع أصدقائهم من نفس الفئة العمرية، وبيكونوا مهتمين بزيادة العلاقات والقبول من أصدقائهم.       ويعتبر حامد زهران ( 1997 ) أن الحاجة للأمن هى محرك الفرد لتحقيق أمنه وبترتبط ارتباط قوي بغريزة الحفاظ على البقاء وبتتضمن الحاجة إلى الأمن لشعور الفرد أنه يعيش فى بيئة صديقة مشبعة للحاجات وأن الآخرين بيٌحبوه وبيحترموه وبيقبلوه في الجماعة .                                                                                        وبيزيد تأثير جماعة الأصدقاء في مرحلة المراهقة في اتجاهات المراهق وميوله وقيمه وسلوكه وبيزيد أثر جماعة الأصدقاء مع زيادة رغبة المراهق في أنه يبقى عضو مقبول في الجماعة دي، ،وبسبب اختلاف الأجيال والفرق فى التفكير، المراهق بيشوف أن أصدقائه أقرب ليه من عيلته بسبب المشاركة بينهم فى الميول والإهتمامات وفي إشباع حاجته الملحة فى تحقيق الاستقلالية واللي بتمثل جزء مهم من عناصر مرحلة المراهقة لأنها كمان بتعلم المراهق مهارات مهمة زي مهارات بناء الثقة بالنفس.     علشان كدا، يعتبر الموضوع دا تحدي كبير لكتير من الأسر، فالأصدقاء في المرحلة دي هما الجماعة المرجعية اللي بيلجأ ليها المراهق، وفي عملية الاختيار واللي بتلاقى تحدي واضح ما بين الأبناء فى الإصرار على الأصدقاء دول بعينهم، وبين اللي بتحرص عليه الأسرة من أسس لحسن الاختيار واللى من المتوقع منه أنه يحقق للأبناء راحة وطمأنينة وتقدم فى علاقاتهم الاجتماعية، ولكن اللي ممكن نتأكد منه هو هل عملية الاختيار الجيد للأصدقاء بتحقق الأمن دا وبترقي من مستوياته ولا لا؟     وبعدها، بيتضمن الإجابة على السؤال دا توضيح مفهوم" الصداقة " بأنها علاقة حميمة متبادلة بين المراهقين من أبناء الجنس الواحد أساسها التقارب النفسي والمكاني والفكري بين الصديقين وبينتج عن التقارب دا تفاعل إيجابي ومشاركة ومساندة بأشكال مختلفة، ومشاركة الآراء والمشاعر والأسرار الشخصية والتعاون والمساعدة والإهتمامات في الميول المختلفة وتجاوز الخلاف والحرص على دوام العلاقة دي.     مما لا شك فيه أن الصداقة مسألة مهمة خلال مرحلة المراهقة، لأن الأصدقاء بيكونوا مصدر الدعم في المرحلة دي، خصوصًا لو كانوا صحبة صالحة، فلازم النقط التالية دي تكون موجودة في الشخص علشان يحقق مفهوم الصداقة:  الأصدقاء بيساعدوا بعض في تطوير مهاراتهم الاجتماعية، وتنمية مهارات بناء الثقة بالنفس وبيبعدوا بعض عن المشاركة في أي سلوكيات سيئة من اللي عادة بيميل ليها المراهق، كنوع من التمرّد، وأن المراهق مش بيحس بالوحدة أو العزلة مع أصدقائه، لأنهم بيشاركوه أفراحه وتمرّده وهمومه. وهو مقتنع بأن مفيش حد في عيلته هيفهمه زي ما هما بيفهموه. ووسط "شلة الأصدقاء" دي، بيحس المراهق على عكس الحال وسط عيلته، بالحرية والثقة، بالإضافة لأنه بيحس أن كلامه وتصرفاته ليهم قيمة. ومن المعروف أن المراهقين بيتفاهموا بينهم وبين بعض، وممكن يتفقوا على مثلهم الأعلى، وفي اللغة والتصرفات.      في تغيرات أساسية في النمو الاجتماعي للمراهق وفى علاقاته الاجتماعية بصفة عامة، لأن صورة الطفل الصغير اللي بيحب البيت وجلسات الأب والأم وصحبتهم في جميع الأوقات بتتغير وبتاخد منحنى تاني وهو رغبة المراهق في إقامة علاقات جديدة مع الأفراد في نفس مرحلته العمرية وبيفضل صحبتهم والخروج معاهم. والأصدقاء ليهم دور مهم في حياة المراهق مش بس بيقتصر على التسلية والترفيه بس، لكن كمان بيوصل لنمو المراهق نفسه وتشكيل هويته طبقًا للنقط دي:  تأثير الأصدقاء أقوى من تأثير الوالدين والراشدين، فالمراهق بيساير معايير أصدقائه أكتر من أسرته والمدرسة، فهو بيتعامل مع الأصدقاء وبيندمج معاهم في الحياة الاجتماعية، وبيعبر عن انفعالاته بحرية بدون قيود. شعور المراهق بالتحرر من قيود الأسرة، وسلطة المدرسة بانتمائه لجماعة الأصدقاء بيساعده على نمو شخصيته واستقلاله .  المراهقين بيأثروا في بعض، أكتر من تأثير نصائح الكبار وإرشاداتهم، ودا لأنهم فاهمين بعض، لأن مشاكلهم في الغالب واحدة، وميولهم واحدة، وتجاربهم من نوع واحد .  وجود المراهقين في جماعة واحدة وسيلة من وسائل الترفيه والمتعة، وشغل أوقات الفراغ .  العلاقات دي بتتيح لأصحابها فرص اكتساب الأدوار والاتجاهات الاجتماعية المناسبة، والعادات الاجتماعية الجيدة، زي: القيادة، والتخطيط . جماعة الأصدقاء بتحمي أعضائها من السلوك المتطرف أو المنحرف، وبتقلل من نوازع الأنانية، وبتدربهم على التخلي عن مطالبهم الخاصة في حال تعارضها مع مطالب جماعة الأصدقاء.  الأصدقاء يقدروا يناقشوا مع بعض الموضوعات الغير مقبولة اجتماعيًا واللي الأسرة أو المدرسة مايقدروش يتكلموا فيها لأنها بتتعارض مع القيم والتقاليد السائدة في المجتمع، فبتتولى جماعة الأصدقاء المهمة دي، وبالتالي بتسد جوانب النقص والقصور في المواضيع دي بغض النظر عن صحة وسلامة القيام بالدور دا.  لقاءات الأصدقاء بتدي فرصة للإطلاع على كل الجديد زي التغيرات الجديدة، الموضة، الاتجاهات الأدبية والفنية، بعيد عن معارضة الكبار أو رفضهم للجديد. ودا بيكبر فكر الأصدقاء وبيوسع آفاق المعرفة عندهم، وبينمي خبراتهم واهتماماتهم .  جماعة الأصدقاء بتزود أعضائها باللي بنسميه "هوية الجماعة". ودا بيعزز ويقوي احساس المراهق بنفسه وهويته من خلال انتمائه للجماعة دي ، فبالتالى بيوصل الشخص لإحساس بالحرية والاستقلالية والثقة في النفس وهى عناصر مهمة فى تشكيل شخصية المراهق والوصول للأمان والتوافق النفسى . فالصداقة هتفضل هي الداعم الأساسى لتحقيق التوافق النفسى والاجتماعى عند المراهق باعتبارها عامل مهم فى النمو الاجتماعي وفهم طبيعة العلاقات الاجتماعية والمشاركة فى التوازن النفسى .   لو بتواجه أي مشاكل في تربية أولادك المراهقين أو مش عارف إزاي توجههم صح في المرحلة دي وتبني معاهم مهارات بناء الثقة بالنفس، تقدر دلوقتي تحجز مع (هدير السيد)، أخصائي نفسي، كاتبة المقال المتخصصة في القلق، الاكتئاب، الرهاب الإجتماعي، الوسواس القهري، مشاكل المراهقين، اضطرابات الشخصية، مشاكل الأطفال النفسية والسلوكية والمهارات الاجتماعية، بسهولة وأمان من وأنت في مكانك من هنا: https://esaal.me/ar/book-session/Hadeer-El-Sayed?catId=14   #وقت_الفصل #وقت_الفصل_من_الضغوطات #الأصدقاء_والمراهقة #مرحلة_المراهقة   #الصحة_النفسية_للمراهقين   إقرأ المزيد

كيف يمكن للآباء فهم تأثير التغيرات الهرمونية ودعم أبنائهم في التعامل معها؟

كيف يمكن للآباء فهم تأثير التغيرات الهرمونية ودعم أبنائهم في التعامل معها؟   فترة المراهقة تعتبر مرحلة حاسمة في حياة الأفراد؛ لأنها بتشهد العديد من التغيرات النفسية والجسدية الناتجة عن التغيرات الهرمونية. مهم يكون الآباء على دراية بالتغيرات دي ويعرفوا إزاي يتعاملوا معاها؛ علشان يقدروا يدعموا أبنائهم بشكل فعّال. فهم التحولات دي بيساعد الآباء على تقديم الدعم النفسي اللازم، اللي بالتالي بيساعد المراهقين على التعامل مع تحديات مرحلة المراهقة بشكل صحي وبناء.   التأثيرات النفسية للتغيرات الهرمونية   التغيرات المزاجية: ممكن يلاحظ الآباء تغير المزاج عند أبنائهم المراهقين، ممكن ينتقلوا من الفرح للحزن بسرعة.  التقلبات دي جزء طبيعي من عملية النمو، وممكن تكون نتيجة للتغيرات الهرمونية. البروجسترون والإستروجين عند البنات، والتستوستيرون عند الشباب، اللي بيتسببوا في تغيرات مزاجية حادة. مهم يدرك الآباء أن التقلبات دي مش دايمًا هتكون تحت سيطرة أبنائهم المراهقين.   القلق والاكتئاب: ممكن تزيد مستويات القلق والاكتئاب خلال فترة المراهقة. عشان كدا، لازم يكون الآباء حذرين ويلاحظوا أي تغيرات سلوكية تدل على مشكلات نفسية أكبر، زي العزلة أو فقدان الإهتمام بالأنشطة اليومية. الاكتئاب والقلق ممكن يكونوا نتيجة مباشرة للتغيرات الهرمونية، بجانب التحديات الاجتماعية والأكاديمية اللي بيواجهها المراهقين.   الاندفاعية: ممكن يبقى المراهقين مندفعين بنسبة أكبر وبتبقى قدرتهم أقل على التحكم في تصرفاتهم، ودا ممكن يأدي لاتخاذ قرارات متهورة أو التصرف بشكل غير مسؤول. زيادة الهرمونات ممكن تأثر على الجزء الأمامي من الدماغ المسؤول عن التخطيط واتخاذ القرارات، وبالتالي بيكون صعب على المراهقين التفكير بشكل منطقي في بعض الأوقات.   التغيرات في الهوية الذاتية: فترة المراهقة هي وقت اكتشاف الهوية الذاتية والتجريب. المراهقين ممكن يبدأوا في التساؤل عن مكانتهم في العالم وعن هويتهم الجنسية والاجتماعية. الفترة دي ممكن تكون مضطربة، لأن البحث دا ممكن يتسبب في إحساسهم بالارتباك والقلق.  أهم الطرق الفعّالة لدعم المراهقين   التواصل المفتوح: لازم يبني الآباء بيئة من التواصل المفتوح والصريح. تشجيع المراهقين على مشاركة مشاعرهم وتجاربهم لتخفيف الضغط النفسي وتحسين الصحة العقلية. الحوار المفتوح والصريح بيعزز الثقة بين الآباء وأبنائهم، وبيتيح ليهم الفرصة يفهموا مشاعرهم وتحدياتهم بشكل أعمق.   التعليم والتوعية: لازم يسعى الآباء لتثقيف نفسهم وأبنائهم عن طريق الكتب، المقالات، ومقاطع الفيديو التعليمية عن التغيرات الهرمونية وتأثيراتها؛ لأن فهم التغيرات دي ممكن يقلل من القلق المرتبط بيها ويخلي المراهقين يحسوا أنهم مش لوحدهم في التجربة دي.    الدعم العاطفي: لازم يكون الآباء داعمين عاطفيًا لأبنائهم، عن طريق تقديم الحب والإهتمام والتفهم، لأن دا ممكن يعزز الثقة في النفس ويساعد في بناء علاقة قوية ومستقرة بين الآباء والأبناء. الدعم العاطفي ممكن يجي على هيئة أشكال مختلفة زي الاستماع الفعّال، التعبيرعن الفخر والاحترام، وتقديم النصائح البناءة.   تشجيع النشاط البدني: النشاط البدني ممكن يكون ليه تأثير إيجابي كبير على الصحة النفسية؛ لأن تشجيع المراهقين على ممارسة الرياضة أو المشاركة في أنشطة بدنية ممكن يساعد في تحسين المزاج وتقليل التوتر. النشاط البدني بيزوّد من إنتاج الإندورفين (هرمون السعادة) وممكن يساعد في تحسين التركيز والطاقة.   تشجيع الهوايات والاهتمامات: تشجيع المراهقين على متابعة هواياتهم واهتماماتهم ممكن يكون ليه تأثير إيجابي على صحتهم النفسية. المشاركة في الأنشطة اللي بيحبوها بيساعدهم في التعبيرعن نفسهم وبناء مهارات جديدة. يقدر الآباء يدعموا أبنائهم من خلال توفير الموارد والفرص اللازمة لتطوير مواهبهم وإهتماماتهم.   توفير الدعم الأكاديمي: ممكن تكون فترة المراهقة مليانة بالتحديات الأكاديمية اللي بتزوّد من الضغط النفسي. تقديم الدعم الأكاديمي، سواء كان من خلال مساعدة الأبناء في تنظيم وقتهم أو توفير موارد تعليمية إضافية، ممكن يقلل من التوتر ويساعدهم في تحقيق أهدافهم الأكاديمية.   التوجيه الاجتماعي: العلاقات الاجتماعية بتلعب دور مهم في حياة المراهقين. لازم يساعد الآباء في توجيه أبنائهم لبناء علاقات صحية والتعامل مع الضغط الاجتماعي، بالإضافة لأن توجيه الأبناء عن أهمية الصداقات الجيدة والتأثيرات السلبية للعلاقات السامة ممكن يكون مفيد.   طلب المساعدة المهنية عند الحاجة: لو لاحظ الآباء أن مشاكل أبنائهم النفسية بتكبر وصعب التعامل معاها في البيت، طلب المساعدة من مستشارين نفسيين أو متخصصين في الصحة النفسية ممكن يكون ضروري في الحالة دي. التدخل المبكر من خلال العلاج النفسي ممكن يساعد في معالجة المشاكل قبل زيادتها.   القدوة الحسنة: الآباء لازم يكونوا قدوة حسنة لأبنائهم، تصرفات الآباء وسلوكهم ممكن يكون ليه تأثير كبير على المراهقين. من خلال إظهار طرق فعّالة للتعامل مع التوتر والمشكلات، يقدر يقدم الآباء نماذج إيجابية يحتذى بها.   المرونة والصبر: التعامل مع المراهقين بيحتاج لمرونة وصبر. لازم يدرك الآباء أن المرحلة دي هي جزء من نمو أبنائهم وأنها مليانة بالتحديات والتغيرات. تقديم الدعم المستمر والتفهم ممكن يساعد المراهقين في تجاوز فترة المراهقة بسلام.   من خلال فهم التغيرات النفسية الناتجة عن التغيرات الهرمونية في فترة المراهقة واستخدام استراتيجيات الدعم الفعّالة، يقدر الآباء يساعدوا أبنائهم في اجتياز المرحلة دي بشكل صحي وبنّاء. التعامل بحكمة وحنان مع المراهقين ممكن يقوّي العلاقة الأسرية ويساعد في تكوين جيل قادر على التعامل مع تحديات الحياة بثقة ونجاح وكمان يساعد في تنمية مهارات بناء الثقة بالنفس.   كأب، مهم جدًا تعرف استراتيجيات التعامل مع أولادك المراهقين علشان تقدر تساعدهم في النمو الصحي السليم المتوازن. احجز دلوقي مع (شيماء إسلام)، أخصائي نفسي، وصاحبة المقال المتخصصة في القلق، الاكتئاب، الوسواس القهري، الاضطرابات السلوكية للمراهقين والأطفال، ذوي الاحتياجات الخاصة بكل سهولة وخصوصية واستشيرها في كل الأسئلة اللي بتدور في بالك عن التأثيرات النفسية لمرحلة المراهقة على أولادك من هنا: https://esaal.me/ar/book-session/Shaimaa-Islam?catId=14 #وقت_الفصل #وقت_الفصل_من_الضغوطات #دعم_المراهقين #التأثيرات_النفسية_لمرحلة_المراهقة   #مرحلة_المراهقة   إقرأ المزيد

إزاي المدرسين يدعموا المراهقين في تحديد وتطوير اهتماماتهم الأكاديمية والشخصية؟

إزاي المدرسين يدعموا المراهقين في تحديد وتطوير اهتماماتهم الأكاديمية والشخصية؟  تعتبر فترة المراهقة فترة مهمة بينتقل فيها الفرد من مرحلة الطفولة لمرحلة النضج. بتشكل المرحلة دي مخاوف وتحديات للمراهقين بسبب التغيرات اللي بيمروا بيها لحد ما يقدروا يكتشفوا مغزى حياتهم ويغيروا حياتهم بطرق جديدة وفعالة زي:   تحديد القيم المهمة فى حياتك واللي هتكون بوصلتك اللي بتوجهك للمكان اللي عايزه، وتقدر تستعين بقائمة القيم اللي ترجمها د/ عبد الجواد خليفة واللي بتتمثل في (الحب، التسامح، الأسرة، العلاقات الحميمة، إنجازات العمل، الصداقة، النجاح المالي، الاحترام، الانسجام الداخلي، التطوير الشخصي، الجمال الجسدي أو الجاذبية، الصحة، الدعم، القبول، التعاطف، الامانة، الحكمة، التدين، الحرية، المصداقية، الشجاعة، التعاون، العدل، المرح، حب الاستطلاع، المثابرة والاستمرار، الإبداع، الأمن، الحماية، الثقة والوفاء) علشان تقدر تحدد قيمك كلها فى الحياة ، بعدها حدد مدى أهمية القيم دي بالنسبة ليك مش اللي ممكن يحتاجه الناس منك.    بعد ما تقدر تختار مجموعة من القيم، اختار مجال واحد من مجالات الحياة يكون هدفك خدمته زي الصحة، العلاقات، الصداقة، الأسرة، العمل، الدراسة، وتطوير الذات. اربط قيمة محددة بالمجال اللي اخترته ( أحب عيلتي، أهتم بدراستي، أو ألتزم بممارسة الرياضة).   بعدها تقدر تختار هدف مدفوع بقيمتك اللي حددتها، وكوّن الأهداف دي بطريقة إيجابية وبصفتها أهداف تقدر تحققها وخليك محدد ومفصل وحط جدول زمني فعلي للأهداف (أنا هروح الجيم كل يوم سبت الصبح من الساعة7 ل 8).   لازم تكون الأهداف سهلة التحقيق، علشان كدا اختار أنشطة مش مكلفة وتقدر تستمتع بيها، وتقدر تمارسها بشكل متكرر زي (الاستماع للموسيقى، الذهاب للحفلات، تنظيم مناسبة اجتماعية، لعب ألعاب الطاولة مع الأصدقاء أو العائلة، ممارسة تدريبات التعقل، التخطيط لقضاء إجازة، القراءة، الذهاب إلى المكتبة، العمل الخيري أو التطوع........ ). حدد العوائق اللي بتمنعك من تحقيق أهدافك تحديد دقيق زي الاندماج مع أفكارك (التمسك الشديد بالأفكار اللي في راسنا أو بالمشاعر اللى بنحس بيها، أو بالرغبات اللي عايزينها) أو التجنب (تجنب ممارسة أنشطة هادفه بالنسبة لينا) أو تقديم تبريرات لعدم تحقيق أهدافك.   حط خطة محكمة للتغلب علي العقبات اللي بتمنعك من عيش حياة ليها معنى زي تقبل الأفكار والمشاعر والرغبات اللي بتقف سد بينا وبين اللي عايزينه، حتى لو كانت الأفكار والمشاعر دي عكس رغبتنا، وبعدها اختار اتجاه ليه قيمة (اختيار هدف يتماشى مع الشئ اللي بيدينا معنى لحياتنا) واتخاذ اجراءات لتحقيق الأهداف دي (بمعنى أننا نحقق أهدافنا اللى قمنا بتحديدها زي الجيم يوميًا من 7 ل 8. تعاطف مع نفسك لما ماتقدرش تنفذ اللي حددته وخليك عارف أنك بشر وطبيعة البشر ارتكاب الأخطاء والانتكاسات والوقوع فى السلوكيات المدمرة، والإحساس بالاحباط بعدها، وبيكون عندهم أفكار سلبية عن نفسهم وبتزداد المشاعر السلبية وأن ادراك أن اللي بنعاني منه بيعانى منه باقي الناس، بيخلينا متعاطفين مع نفسنا أكتر وعلشان كدا خليك رحيم مع نفسك ولطيف معاها وعرفها أنه طبيعى أننا نقع ولكن هنقوم ونراجع نفسنا ونعرف ايه اللي اتسبب فى وقوعنا ونحاول نصلحه ونحاول مرة تانية، وبيعتبر التراحم الذاتي مهارة تانية تقدر تضيفها لصندوق أدواتك اللى بتساعدك على تخطي أى عقبات ممكن تواجهك وليه أشكال مختلفة، واللي ممكن يساعدك على التحرك ناحية حياة ليها معنى.   تقدر دلوقتي تحجز مع (عزة عزت)، أخصائي نفسي إكلينيكي، وكاتبة المقال من هنا: https://esaal.me/ar/book-session/PhD-Azza-Ezzat?catId=14  بضغطة واحدة على موبايلك وأنت في مكانك علشان تعلرف إزاي تدعم أولادك المراهقين في المرحلة الصعبة دي بكل خصوصية وأمان. #وقت_الفصل #وقت_الفصل_من_الضغوطات #المدرسين_ودعم_المراهقين #مرحلة_المراهقة   #تطوير_شخصية_المراهقين   إقرأ المزيد

إعداد المدرسين لتقديم بيئة تعليمية تدعم تطور المراهقين

إعداد المدرسين لتقديم بيئة تعليمية تدعم تطور المراهقين   العلاقة الإنسانية الناجحة بين المدرس والطالب من أهم العلاقات الإنسانية اللي بتساعد في خلق بيئة تعليمية جيدة وبناء شخصية الطالب وتطوره وزيادة ثقته في نفسه.  بالإضافة لأنها بتساعد المدرس نفسه في زيادة خبراته ومهاراته الإنسانية والتعليمية؛ لأن خلال المراحل الدراسية المختلفة الطالب والمدرس بيقضوا مع بعض وقت أطول من اللي بيقضيه كل واحد منهم مع أسرته. وهنا بنتكلم بشكل خاص عن المراحل التعليمية (المرحلة الإعدادية والثانوية) وهي مراحل المراهقة عند الطلاب، وبيتراوح أعمار الطلاب هنا من 12 الى 18 سنة ودي مرحلة بتتميز بالحساسية الشديدة والانفعالات المتقلبة وبتعتبر مرحلة مهمة في حياة أى طالب؛ لأن بيتشكل فيها شخصيته ومعتقداته وآرائه وأفكاره لباقي مراحل حياته. علشان كدا؛ لازم كل مدرس يكون على وعي بالاحتياجات الأساسية للمراهق في المرحلة دي زي:  1- الحاجات البيولوجية والجسدية: لأنها مرحلة التغيرات الهرمونية واكتشاف الهوية الجنسية والصراع النفسي لإثبات المراهق لذاته مع افتقاره للتصرف بنضج، ولازم في المرحلة دي تزيد الأنشطة الفعالة من رياضة وأنشطة مفيدة وشغل لوقت الفراغ  لتفريغ طاقته الجسدية والتخفيف من حدة الضغط، القلق، والتوتر.  ٢.الحاجة للأمان : المراهق في المرحلة دي بيحتاج للشعور بالحب و خلق حوار مع اللي حواليه، بجانب وضع حدود لتسهيل التفاهم بين الطرفين ، بالإضافة لعدم جعل تصرفاته سبب للنفور منه لزيادة نموه العاطفي بشكل صحي . ٣. الحاجة للتقدير وتحقيق الذات : محاولة إعطاء المراهق مساحة آمنة للتصرف وتجريب أشياء جديدة وتحمل مسؤوليتها؛ لأن دا هيساعده علي تركيب شخصيته طبعًا مع مراعاة عدم التسبب في أضرار ليه. ٤.الحاجة للانتماء : الحاجة للشعور بأنه محبوب بدون انتقاد لجنسه أو شكله أو ديانته هيساعده علي الاندماج في المجتمع.   و هنا لازم المدرس يتحلى بمهارات التواصل الفعال بينه وبين طلابه؛ علشان يخلق علاقة صحية تشجع الطلاب على التواصل الصريح معاه ووجود أريحية التعبير عن نفسهم ومشاعرهم بصورة آمنة وواضحة.    بالإضافة لأن توفير البيئة الآمنة اللي بتساعدهم على التعبير عن آرائهم ووجهات نظرهم في المواضيع المختلفة بيخلي العلاقة ناجحة علي المستوى الشخصي والدراسى وبيساعدهم علي التطور وزيادة ثقتهم بنفسهم ، وهنا يكون المدرس قدوة بأفعاله وتصرفاته نتيجة لقيم احترام الذات و احترام الآخرين  اللي بيعلمها لطلابه، بجانب تقديم المساعدة والدعم للطلاب بدون انتظار أي مقابل من الأهل والمدرسة اللي بيساعد في زيادة ثقة الطلاب في المدرس. و المبادرة بتقديم الدعم والثناء علي جهود الطلاب وإنجازاتهم حتى لو كانت بسيطة وتشجيعهم على استمرار النمو والتطور ومساعدتهم في تحديد أهدافهم الشخصية وتحقيقها بيخلي العلاقة بين المدرس والطالب متميزة وليها معنى ، بجانب أن تقبل الطلاب زي ما هما وتقبل أخطائهم بيخلي فيه مساحة آمنة بين الطرفين. ويجي دور التعزيز السلوكى الإيجابي عن طريق الإيماءات الإيجابية سواء كانت لفظية بكلمات المدح أو غير لفظية بالابتسامة و الإشارات الجسدية المؤيدة للسلوكيات؛ لأن كل ما زاد الدعم السلوكي الإيجابي كل ما قلت السلوكيات الغير مرغوب فيها.  كمان الحفاظ علي العدالة بين الطلاب والمعاملة بعدل بدون تمييز لأسباب شخصية أو حسب الجنس أو الديانة بتخلي المدرس مميز بين الطلاب. المدرس المتفائل اللي بيبعث الأمل والتفاؤل بين طلابه وبيركز علي الجوانب الإيجابية بيكون محبوب والطلاب بتكون متحمسة لمذاكرة مادته أكتر من غيره. وإيمان المدرس أيضًا باختلاف القدرات ويسأل نفسه ما سبب قلة التركيز والسرحانن والتشتت والفهم البطئ ويحاول يدعم الطلاب على السعي الدائم لتحقيق أهدافهم علشان يساعد الطلاب على الاجتهاد والمذاكرة والتحلي بالسلوكيات الجيدة بدون الضغط عليهم لتحقيق نتايج معينة واللي بالتالي بيساعد في علاج الخوف من الفشل الدراسي.  كل دا بيخلي فيه علاقة آمنة وإيجابية بين الطالب والمدرس كلها تعاون؛ وبالتالي المساعدة في نجاح العملية التعليمية وتقليل الضغوط على الطرفين.   لو كنت مدرس أو ولي أمر وعايز تقدم أفضل دعم ممكن لأولادك المراهقين تقدر تحجز جلسة مع (منار عبدالغني)، أخصائي نفسي، علشان تساعدك باستراتيجيات تسهل عليك وعليهم المرحلة دي. احجز دلوقتي بكل خصوصية وسهولة من هنا: https://esaal.me/ar/book-session/Manar-Abdelghany-?catId=14   #وقت_الفصل #وقت_الفصل_من_الضغوطات #مرحلة_المراهقة #دعم_المراهقين   #دور_المدرسين_في_حياة_المراهقين   إقرأ المزيد

تحديات تربية المراهقين وكيفية التغلب عليها: دليل شامل للأهل

تحديات تربية المراهقين وكيفية التغلب عليها: دليل شامل للأهل   تربية المراهقين رحلة مليانة بالتحديات والإثارة في وقت واحد، خلال المرحلة العمرية الحساسة دي، بيمر الأبناء بتغيرات جسدية ونفسية سريعة، بتأدي لصعوبات في التواصل وفهم احتياجات المراهقين. في الدليل الشامل دا، هنستعرض التحديات الأكثر شيوعًا اللي بيواجهها الآباء عند التعامل مع أبنائهم المراهقين، وهنقدم مجموعة من الاستراتيجيات العملية للتغلب عليها بالإضافة لطرح خطوات تساعد في بناء الثقة بالنفس.  التحديات الشائعة عند تربية المراهقين:  * صعوبات في التواصل والتعبير عن المشاعر: المراهقين بيواجهوا صعوبة في التعبير عن مشاعرهم وأفكارهم بطريقة واضحة ومباشرة، ودا بيأدي لسوء الفهم والتوتر. * الخصوصية: بتزيد رغبة المراهقين في الخصوصية والاستقلال، وبالتالي بيصعب التواصل معاهم.  * التغيرات الجسدية والنفسية:  -   التغيرات الهرمونية: بتأثر التغيرات الهرمونية على مزاج المراهقين وسلوكهم. -    تشكيل الهوية: المراهقين بيسعوا لتكوين هويتهم الخاصة، ودا بيأدي لتجربة مشاعر مرتبكة ومتضاربة..  * التكنولوجيا: - الإدمان على الأجهزة: بيمثل الإدمان على الهواتف الذكية والأجهزة اللوحية تحدي كبير للآباء، لأنه بيأثر على سلوك المراهقين وأدائهم الأكاديمي. - التأثير على العلاقات الاجتماعية: ممكن تأثر التكنولوجيا بالسلب على العلاقات الاجتماعية للمراهقين مع أصدقائهم وعائلتهم.  * تحديد الحدود: -   الصراع على السلطة: المراهقين بيسعوا لاكتساب المزيد من الاستقلال، ودا بيأدي لوجود صراعات حول تحديد حدودهم الشخصية. - عدم الالتزام بالقواعد: المراهقين ممكن يواجهوا صعوبة في الالتزام بالقواعد والروتين اليومي.  * الضغوط النفسية:  - الضغوط الأكاديمية: بيتعرض المراهقين لضغوط كبيرة لتحقيق النجاح الأكاديمي.  - الضغوط الاجتماعية: بيسعى المراهقين بشكل دائم للتوافق مع أصدقائهم، ودا بيزود إحساسهم بالضغط والقلق. - مشاكل العلاقات: ممكن يواجهوا صعوبات في العلاقات الاجتماعية، زي تكوين الصداقات والعلاقات العاطفية.  * التحدي للسلطة: - التمرد: بيميل المراهقين للتمرد على السلطة، سواء كانت من الأهل أو المدرسين.  - اللجوء لسلوكيات غير مرغوب فيها: ممكن يلجأ المراهقين لسلوكيات غير مرغوب فيها للتعبير عن غضبهم أو إحباطهم. إزاي تتغلب على التحديات دي؟  * بناء علاقة قوية:  قضاء وقت ممتع مع أبنائك: خصص وقت منتظم لقضاء وقت ممتع مع مراهقك، بعيدًا عن الأجهزة الإلكترونية.    * الاستماع الفعال: اسمع لأبنائك المراهقين بانتباه واهتمام بدون مقاطعتهم أو الحكم عليهم.    * التعبير عن الحب والدعم: عبر لمراهقك عن حبك ودعمك ليه بشكل مستمر.  * التواصل الفعال: - الحوار المفتوح: شجع الحوار المفتوح والصريح بينكم، حتى لو كانت مواضيع النقاش صعبة. - لغة جسد إيجابية: استخدم لغة جسد إيجابية وقت الكلام مع مراهقك، زي التواصل البصري والابتسام. - تجنب اللوم والاتهام: تجنب لوم مراهقك أو اتهامه، وبالعكس حاول تفهم وجهة نظره.  * تحديد حدود واضحة: - وضع قواعد مشتركة: حط قواعد واضحة ومناسبة لسلوك مراهقك، واشركه في وضع القواعد دي. - التطبيق الثابت للقواعد: التزم بتطبيق القواعد بشكل ثابت وعادل. - تقديم التوضيحات: اشرح لمراهقك الأسباب وراء القواعد دي.  * الدعم العاطفي: - تشجيع الاستقلال: شجع مراهقك على إتخاذ قراراته الخاصة، مع تقديم الدعم والتوجيه اللازمين. - التعامل مع المشاعر: ساعد مراهقك على التعرف على مشاعره والتعبير عنها بطريقة صحية. - البحث عن الدعم المهني: بلاش تتردد في طلب المساعدة من متخصص في الصحة النفسية لو احتجت.  * القدوة الحسنة: - خليك قدوة: خليك قدوة حسنة لمراهقك في كل تصرفاتك. * التعامل مع الصراعات: علم مراهقك إزاي يتعامل مع الصراعات بشكل سلمي وبناء.   نصائح إضافية  * الصبر والتفهم: افتكر أن المراهقة مرحلة صعبة، وبتحتاج لكتير من الصبر والتفهم.  * الاحترافية: اتعامل مع مراهقك باحترام كشخص بالغ.  * التعليم: علم مراهقك مهارات الحياة الأساسية، زي إدارة الوقت والتعامل مع الضغوط.  * الاستمتاع بالرحلة: استمتع بتربية مراهقك، لأنها فرصة لتقوية علاقتكم وبناء ذكريات جميلة. ختامًا تربية المراهقين رحلة كلها تحديات، ولكنها كمان فرصة كبيرة لبناء علاقة قوية ومستدامة مع أطفالك. من خلال تطبيق الاستراتيجيات دي، تقدر تساعد مراهقك على النمو والتطور لشخص بالغ واثق من نفسه وسعيد. ملاحظة: الدليل دا بيهدف لتقديم معلومات عامة عن تربية المراهقين. لو كنت بتواجه صعوبات كبيرة في التعامل مع مراهقك، الأحسن تستشير متخصص في الصحة النفسية.   ملاحظات هامة:  * التخصيص: كل مراهق فريد من نوعه، علشان كدا محتاج تعمل على تكييف النصائح دي لتناسب ظروفك الخاصة.  * الدعم المهني: لو كنت حاسس أنك محتاج لدعم إضافي، بلاش تتردد في طلب المساعدة من متخصص.  * التحديث المستمر: عالم المراهقة متغير باستمرار، خليك على اطلاع دايم بأحدث المعلومات والاتجاهات.   تحديات مرحلة المراهقة صعبة وعنيفة على الأهل، تقدر دلوقتي تحجز جلسة مع (مي عمار)، أخصائي نفسي إكلينيكي، بكل سهولة وبضغطة من على موبايلك علشان تساعدك تتغلب على التحديات المتعلقة بمرحلة المراهقة على موقع اسأل الإلكتروني من هنا: https://esaal.me/ar/book-session/Mai-Ammar?catId=14 #وقت_الفصل #وقت_الفصل_من_الضغوطات #تحديات_تربية_المراهقين #دعم_المراهقين#مرحلة_المراهقة #دليل_تربية_المراهقين   إقرأ المزيد

تأهيل المدرسين والأهالي لدعم نمو المراهقين بشكل صحي

تأهيل المدرسين والأهالي لدعم نمو المراهقين بشكل صحي   بنسمع ناس كتيرة بتشتكي من فترة المراهقة وبتوصفها أنها مزعجة.  لكن الحقيقة أن الفترة دي زيها زي باقي فترات حياة الإنسان لكن هي مهمة وحيوية وفارقة في حياته لأنه بيخرج من فترة الطفولة اللي كان مبيقدرش يميز فيها بين الأشياء لفترة بتأهله أنه يكون شخص راشد ناضج مسئول عن نفسه ومتحمل مسؤلية علاقاته بالآخرين.  وبكدا المشكلة مش في المرحلة نفسها لكن في عدم الإلمام بطبيعتها واحتياجات المراهقين فيها، وإزاي يدعم الأهالي أبنائهم علشان يكبروا بصحة خلال المرحلة الفاصلة دي من حياتهم. المدرسين كمان من الناس المؤثرين في المرحلة دي بسبب دورهم في تعليم الأطفال ومعاملتهم ومساعدتهم في فهم نفسهم وقدراتهم.  ودلوقتي خلينا نسأل السؤال الأهم إزاي يتعامل الأهالي والمدرسين مع المراهقين لتحقيق نمو سوي؟؟  وعلشان نجاوب السؤال دا محتاجين نعرف أكتر عن طبيعة المرحلة.   في مرحلة المراهقة بيكتمل نمو العقل والنمو الجنسي، ودا بيخلي الشخص عايز يفكر في أي حاجة وبيزوّد رغبته في تكوين شخصية مستقلة عن أي شخص تاني ودا بيزعج الأهالي أوقات ولكنه في الحقيقة احتياج أساسي في المرحلة دي وضروري يساعد الأهالي والمدرسين المراهقين في اشباع الاحتياج دا علشان يضمنوا نمو سوي، عن طريق الكلام معاهم عن اللي نفسهم يحققوه واللي مش حابينه ويتناقشوا معاهم ويطرحوا وجهة نظرهم بدون فرضها عليهم ويحترموا وجهة نظرهم حتى ولو كانوا مش متفقين معاها ويكونوا واعين أن وجهة نظرهم بيكون فيها احتياج محتاجين يلبوه سواء كانت أنهم عايزين يبقوا محبوبين، مهمين، أو ذو قيمة.  مهم كمان يبدأوا مع أبنائهم من الطفولة، لأن دور الأسرة في الصحة النفسية للطفل كبير وبيأثر عليه في مرحلة المراهقة، ومهم يعلّموا المراهقين أن كل حاجة ليها وجهات نظر مختلفة ويلفتوا نظرهم للي عايزينهم يخدوا بالهم منه مع توضيح السلبيات والإيجابيات للأشياء وتوجيهم في أنهم يتأكدوا من الأمور اللي بيقولوها ليهم وهما مش مصدقينهم فيها ويتقبلوا فكرة أنه مش شرط يتفقوا معاهم أو أنهم يعملوا اللي عايزينه ولأنهم عايزين يكون ليهم شخصية مستقلة ولكن مجرد توجيهم وتعليمهم أن تحمل مسؤولية نفسهم معناها أنهم هيتحملوا نتائج قراراتهم سواء كانت صح أو غلط وأن الشباب والقوة مش معناهم أن الشخص يضيع وقته في اللي يضره لكن بالعكس المسؤولية بتلزمه أنه ياخد باله من نفسه ويخليها شئ كبير، وكمان تقبل المدرسين أنهم ممكن يحبوا يحلوا المسائل بطريقة غير اللي اتشرحت ليه منهم أو أنهم بيفكروا بطريقة مختلفة، ومطلوب من المدرس هنا أنه يكون مرن ويفهم أن طلابه بيفكروا بطريقة مختلفة ومايمنعهمش أو يخليهم يفتكروا أن طريقته هي الطريقة الوحيدة الصحيحة علشان مايأذيش الطلاب ومايمنعش اختلاف شخصيتهم وفروقهم الفردية أنها تظهر، وبدل ما يدور على طريقة علاج ضعف التركيز وتشتت الانتباه عند الأطفال أو المراهقين، ويساعدهم يكونوا نفسهم ويكونوا مميزين ويدعم فكرة الاختلاف ويساعد كل طالب أنه يفكر بطريقته وأنه مفيش نموذج واحد للتفكير أو الإجابة على الأسئلة وإحتمال أن يكون في إجابات مختلفة لكن كل إجابة بترجع لمنظور مختلف غير كدا أهم حاجة في النهاية الوصول للحل نفسه ويسأل نفسه دايمًا ما سبب قلة التركيز والسرحان والتشتت والفهم البطئ. المدرسين كمان محتاجين يتكلموا عن ترسيخ بعض القيم والأهم أنهم يكونوا قدوة فيها، بمعنى لو اتكلموا عن الاحترام وأن المراهق لازم يحترم الآخرين، لازم يكونوا هما نفسهم بيحترموا الأخرين واختلافاتهم، مع تأكيد فكرة أن الحرية مسؤولية وأن لو المراهق تسبب في مشكلة هيكون مطلوب منه يصلحها ولو كسر حاجة يجيب غيرها من مصروفه، ولو اساء لشخص لازم يعوضه باعتباره شخص كبير مش طفل. مهم جدًا كمان الصبر على المراهقين وعلى أخطائهم ولازم يعرفوا أن الغلط طريقة لتعليم الأصح والأنسب.  علشان كدا مرحلة المراهقة مرحلة لازم يمر عليها الشخص علشان ينضج فعلًا، فلازم يتعلم الآباء والمدرسين إزاي يتعاملوا مع الأخطاء بدون تسلط ويصبروا على المراهقين لأنهم في المرحلة دي بيكونوا مش ناضجين كفاية، وتعلمهم من الأخطاب بيكون طبيعي وبيساعدهم ينضجوا أكتر خصوصًا لو اتكلموا في أسبابه مع بعض وحللوا المواقف بالعقل وناقشوها مع المراهقين، واستخدموا في كلامهم اللي يأثر في شخصيتهم (قيمهم -أهدافهم –اللي بيحبو واللي بيكروهه) وبلاش يتخضوا من الغلطات أو يدوا الغلطات أكبر من حجمها علشان مايتسببوش في عدم ثقتهم في نفسهم أو في عدم تقبلهم لطبيعتهم كبشر بيغلطوا فينموا بطريقة غير سوية تأثر عليهم في المستقبل.  وأحيانًا بيحس الأهالي والمدرسين بمسؤولية كبيرة في كل كبيرة وصغيرة، ودا بيخليهم تحت ضغط كبير بيحطوه علي المراهقين.  والحقيقة أنهم مش مسؤولين عن كل كبيرة وصغيرة في حياة أبنائهم ولكن الفكرة دي ممكن تيجي من تأثير القلق الزائد عليهم.  والنقطة دي مهمة جدًا؛ لأن كتير من الأهالي والمدرسين باحساسهم الزائد بالمسؤولية عن كل كبيرة وصغيرة ورغبتهم في أن كل حاجة تعدي من غير أي مشاكل أو خلافات وقلقهم الزيادة بيدوا الأمور أكبر من حجمها وبيتسببوا في نقل قلقهم لأبنائهم.  فمهم جدًا وضروري وخطير أن الأهالي والمدرسين يكونوا قادرين أنهم ينظموا انفعالاتهم سواء كانت القلق أو الغضب أو الحزن؛ علشان دا مايتسببش في عدم النضج الإنفعالي للمراهقين نفسهم أو يخليهم غضبانين أو قلقانين معظم الوقت من تأثيرهم عليهم، وأنهم يعرفوا أن عليهم مسؤولية كبيرة في أنهم يكونوا قدوة ومش في اطلاق الأوامر، لأنهم أحيانًا بيكونوا منفعلين وأولادهم بيردوا عليم بعصبية، فا يرموا اللوم على المراهقين على أنهم بقوا منفعلين أكتر وهما مش مدركين أن دا بسبب تأثيرهم هما عليهم، وكمان مهم يعلموا أولادهم تأثير الضغوطات النفسية وكيفية التعامل معها. غير كدا، الموقف دا هيخلي المراهقين مش قادرين على تنظيم إنفعالاتهم والخجل من أنهم بيغضبوا ولكن الطريقة الصح لتعليم المراهقين إزاي ينظموا انفعالاتهم هي تنظيم الأهالي والمدرسين نفسهم لانفعالاتهم؛ لأن صعب جدًا نطلب من المراهق أنه يتحكم في غضبه وأنا مش قادر اتحكم في غضبي كولي أمر أو مدرس. وأحيانًا قلق الـلأهالي والمدرسين الزائد من حدوث مشكلة بيخليهم يحرموا المراهقين من حاجات كتير بسبب الخوف من وقوع المشاكل بدل من توجيهم، ودا بيحرم المراهق من التجربة المفيدة وبيوصله إحساس أن أهله والمدرسين بيتعمدوا مضايقته وحرمانه من أشياء لأنهم عايزين كدا.  فمهم جدًا تنظيم الأهالي والمدرسين انفعالاتهم لأن أحيانًا بيكون شعور بدون سبب موضوعي، فمهم لما يحس ولي الأمر بالقلق يسأل نفسه ايه اللي قلقه وايه الدليل أن دا هيحصل أو مش هيحصل ويوازن أفكاره علشان يقدر يقيم لو كانت مخاوفه واقعية ولا لا، ولو كانت واقعية هل في حل تاني يساعدهم يعملوا اللي عايزينه؟   ودا أهم حاجة في التربية والتعليم تنظيم الانفعالات، تنظيم الانفعالات، تنظيم الانفعالات    أما بالنسبة للنضج الجنسي، لازم الأهالي والمدرسين يبدأوا يوعوا المراهق أن في تغيرات في جسمه ممكن  تخليه يحس بإنجذاب للجنس الآخر. لكن الحقيقة أنه في مرحلة أنه بيبني شخصيته المستقلة وأنه يتحمل مسؤولية نفسه بالكامل، لأن دا مش وقت أن حد يحب حد فيه لأن شخصيته لازالت تحت التكوين ومالهاش شكل معين علشان يعرف منه هو عايز ايه أو علشان يحدد ايه المناسب وايه مش مناسب ليه أو أنه يكون فيه شخصية معينة فيها مميزات تستحق تتحب.  والمهم في الوقت دا أن المراهق يبني شخصيته ويعرف كتير عن نفسه ولما يستقر على حاجة، هيكون فاهم نفسه أكتر ويقدر يصلحها لو غلطت، وبالتالي يقدر يتحمل مسؤوليتها وساعتها يقدر يدخل في علاقة ويتحمل مسؤولية الآخرين.    الملخص: -اعرف أن احتياج الاستقلال احتياج أساسي عند المراهقين وساعد في تلبيته.  -احترم اختلاف المراهق عن والديه والمدرسين ومناقشته وتوجيهه بدون تسلط والصبرعلي غلطاته مع الاتفاق علي بعض القيم.  -تنظيم الأهالي والمدرسين لانفعالاتهم هي أحسن طريقة لتعليم المراهقين إزاي ينظموا انفعالاتهم ويتعاملوا معاها خصوصًا مشاعر القلق والغضب.  -الأهم في التربية والتعليم أن يكون اللي بيقوم بيهم قدوة في تصرفاته ومش آمر وناهي بس. -النضج الجنسي مش منفصل عن النضج الانفعالي والنفسي، فمهم يشتغل على النضج الانفعالي وتكوين الشخصية اولًا قبل الدخول في علاقة مع شخص آخر.    لو كنت مدرس أو ولي أمر، مهم تعرف أن دعم المراهقين خلال المرحلة الحرجة دي شئ أساسي لتجاوز المرحلة وضمان نمو صحي وسليم. تقدر تحجز جلستك دلوقتي مع (نوران أمين)، أخصائي نفسي، وكاتبة المقال، بكل شهولة وخصوصية وأمان علشان تعرف أكتر عن دعم المراهقين عن طريق موقع اسأل الالكتروني من هنا: https://esaal.me/ar/book-session/AbdEl-Rahman-Sayed?catId=14   #وقت_الفصل #وقت_الفصل_من_الضغوطات #دعم_المراهقين #مرحلة_المراهقة   #الدليل_الشامل_لدعم_المراهقين   إقرأ المزيد

أهمية البيئة النفسية المناسبة للمدرسين

أهمية البيئة النفسية المناسبة للمدرسين   هل الضغوطات النفسية تغير الإنسان من المشاركة والراحة إلى كتلة من الصمت؟ البيئة النفسية المناسبة بتلعب دور كبير في تعزيز الأداء الوظيفي للمدرسين. لما بيحس المدرس بالأمان والدعم، بيكون عنده القدرة على التعامل مع التحديات اليومية اللي بيواجها في الفصول المدرسية بشكل أحسن. بجانب أن البيئة المناسبة بتساهم في تقليل مستويات التوتر والإجهاد، ودا بيساعد المدرس على المحافظة على صحته النفسية والجسدية.   التحديات اللي بيواجها المدرسين   بيواجه المدرسين تحديات مختلفة ممكن تأثر على صحتهم النفسية زي:    الضغط الوظيفي: بيتعرض المدرسين لضغوط متزايدة نتيجة لزيادة متطلبات العمل، وتوقعات الأهالي، ومتطلبات الإدارة. قلة الموارد: في بعض الأوقات، بيفتقد المدرسين الموارد الكافية لتنفيذ دروسهم بفعالية. التعامل مع سلوك الطلاب: ممكن يكون التعامل مع سلوكيات الطلاب المختلفة مصدر للتوتر والإجهاد. عدم التقدير: بعض المدرسين بيحسوا أن جهودهم مش بتتقدر بشكل كافي من الطلاب أو أولياء الأمور أو الإدارة.   العوامل المؤثرة في بيئة العمل   في عدد من العوامل اللي بتساعد في خلق بيئة عمل مناسبة للمدرسين، من أهمها: المرافق والتجهيزات: لازم تكون الفصول الدراسية مجهزة بأحدث الوسائل التعليمية والتكنولوجية، زي أجهزة الكمبيوتر، والسبورات الذكية، والمكتبات الغنية بالموارد. كمان مهم توفير مرافق أساسية زي دورات المياه النظيفة والمجهزة وأماكن للراحة.    الرواتب والمزايا: الرواتب العادلة والمزايا بيعتبروا من من أهم العوامل اللي بتأثر في رضا المدرسين بشكل كبير. مهم تتناسب الرواتب مع الجهود المبذولة بما يتناسب مع تكاليف المعيشة، ومهم تقديم الحوافز والمكافأت بشكل دوري.    التطوير المهني: لازم يتاح للمدرسين فرص للتطوير المهني المستمر، سواء من خلال الدورات التدريبية أو المؤتمرات أو الورش. لأن دا بيساعد على تحسين مهاراتهم وتحديث معلوماتهم، واللي بينعكس بالإيجاب على جودة التعليم.   التقدير والاعتراف:  لازم يتم تقدير جهود المدرسين والاعتراف بإنجازاتهم. ممكن يتم دا عن طريق كلمات الشكر، أو الجوائز، أو حتى الاحتفالات الصغيرة. النوع دا من التقدير بيقوي من من روح العمل وبيحفز المدرسين على الاستمرار في العطاء.   دور المجتمع والحكومة   توفير بيئة عمل مناسبة للمدرسين مش بس مسؤولية المدرسة لوحدها، لكن كمان لازم يكون في دعم من المجتمع والحكومة. ممكن تساعد الحكومة من خلال وضع سياسات تحمي حقوق المدرسين، وتوفير التمويل اللازم لتحسين المرافق والتجهيزات. والمجتمع يقدر يدعم المدرسين عن طريق التعاون مع المدرسة والمشاركة في الأنشطة التعليمية.  استراتيجيات توفير بيئة نفسية مناسبة   من أهم الاستراتيجيات لضمان توفير بيئة نفسية مناسبة للمدرسين:   الدعم الإداري: مهم توفر الإدارة دعم فعّال للمدرسين من خلال التواصل المستمر وتقديم المساعدة عند اللزوم. التدريب والتطوير المهني: إتاحة فرص التدريب والتطوير المستمر للمدرسين بيساعدهم على تحسين مهاراتهم وزيادة ثقتهم بنفسهم. توفير الموارد: ضروري يتم توفير المواد الدراسية والأدوات اللازمة؛ لتمكين المدرسين من تقديم دروس فعّالة. تقدير الجهود:  مهم يتم تقدير جهود المدرسين وتشجيعهم من خلال المكافآت والشكر والتقدير. توفير الدعم النفسي:  توفير خدمات استشارية ونفسية للمدرسين لمساعدتهم في فهم الضغوطات النفسية وكيفية التعامل معها. الخاتمة توفير بيئة نفسية مناسبة للمدرسين مش بس ضرورة لضمان جودة التعليم، ولكن كمان حق أساسي للمدرسين كأفراد.  عن طريق تجهيز بيئة داعمة وآمنة، يقدر المدرسين يحسوا بالتحفيز والرضا، واللي بينعكس بالإيجاب على أدائهم وعلى تجربة الطلاب التعليمية.   لو أنت مدرس وعايز تعرف أكتر عن إزاي تحافظ على صحتك النفسية وتبعد عنك الاحتراق النفسي أو الوظيفي، تقدر تحجز جلسة مع (ياسمين فرج)، أخصائي نفسي إكلينيكي، وكاتبة المقال علشان تساعدك باستراتيجيات متنوعة لمحاربة الضغوطات. احجز دلوقتي عن طريق موقع اسأل الالكتروني من هنا https://esaal.me/ar/book-session/Yasmine-Farag?catId=14 بكل خصوصية وأمان.   #وقت_الفصل #وقت_الفصل_من_ضغوطات_العمل #أهمية_البيئة_النفسية_للمدرسين #تحديات_بيئة_العمل   #الدعم_النفسي_للمدرسين   إقرأ المزيد

التعامل مع السلوكيات المُشكلة لأولياء الأمور وتأثيرها على المدرسين

التعامل مع السلوكيات المُشكلة لأولياء الأمور وتأثيرها على المدرسين    التعامل السيء لأولياء الأمور مع المدرسين قضية مهمة بتأثر بالسلب على جودة التعليم والعلاقة بين المدرسة والأسرة. بيتسبب السلوك السئ دا في توتر بين الأطراف المعنية وممكن يكون ليه انعكاس سلبي على العملية التعليمية كلها. من أهم النقط المرتبطة بالموضوع دا:   أسباب التعامل السئ سوء الفهم والتوقعات: أحيانًا بيكون في عند أولياء الأمور توقعات غير واقعية من المدرسين بخصوص أداء أبنائهم، وعند عدم تحقيقي التوقعات دي ممكن يواجه المدرسين نقد أو هجوم غير مبرر. تأثير الإعلام: ممكن يأدي تضخيم الإعلام لبعض الحوادث التعليمية لتعزيز نظرة سلبية عند أولياء الأمور ناحية المدرسين، ودا بيخليهم يتجهوا للمعاملة الغير لائقة معاهم. ضغوط الحياة: ممكن يتعرض أولياء الأمور لضغوط نفسية بسبب مشاكل في حياتهم اليومية، وبيخرجوا الضغط والغضب في المدرسين.   تأثير التعامل السيء التأثير النفسي على المدرسين: التعامل السئ ممكن يأدي لتدهور الحالة النفسية للمدرسين، وبالتالي ينعكس سلبيًا على أدائهم المهني ويأثر على جودة التعليم. التأثير على العلاقة بين المدرس والطالب: ممكن يأدي التدخل السلبي لأولياء الأمور لتدهور العلاقة بين المدرس والطالب، لأن الطالب بيحس بعدم احترام المدرس وبالتالي فعالية العملية التعليمية بتقل. تراجع في التحصيل الدراسي: التوتر بين المدرس وأولياء الأمور ممكن يأثر على تركيز الطالب وعلى استعداده للتعليم، وبالتالي تراجع المستوى الأكاديمي للطالب. . طرق التعامل مع المشكلة تعزيز التواصل: لازم يكون في قناة تواصل بين المدرسين وأولياء الأمور بتعتمد على الشفافية والاحترام المتبادل. ممكن يتم عقد اجتماعات بشكل دوري للكلام عن أداء الطالب وحل المشاكل قبل ما تكبر. توعية أولياء الأمور: لازم يتم توعية أولياء الأمور بدورهم الفعال في دعم المدرسين، وأن التعاون بينهم وبين المدرسين بيعزز من أداء أبنائهم الأكاديمي. إدارة التوقعات: مهم جدًا أن أولياء الأمور يدركوا الحدود والإمكانات المتاحة للمدرسين، وأن التوقعات الواقعية بتساعد في تحسين العلاقة بين الطرفين. تطوير برامج تدريبية:  للمدرسين: بيساعد تقديم دورات تدريبية للمدرسين في وصف كيفية التعامل مع أولياء الأمور الصعبين، وتدريبهم على مهارات إدارة النزاعات وبناء العلاقات. أولياء الأمور: تنظيم ورش العمل التدريبية اللي بتهدف لتوعية أولياء الأمور عن كيفية تقديم الدعم للعملية التعليمية، وتثثقيفهم عن دورهم في تعزيز التعاون بين المدرسة والبيت. استخدام وسيط: في حالة وجود نزاعات متكررة أو كبيرة بين أولياء الأمور والمدرسين، ممكن يتم الاستعانة بوسيط محايد زي مستشار تربوي أو مدير المدرسة للمساعدة في حل النزاع بشكل يضمن احترام كل الأطراف. تطبيق سياسات واضحة: مهم تحط المدرسة سياسات واضحة عن كيفية تعامل أولياء الأمور مع المدرسين، بجانب إجراءات التعامل مع الحالات السلبية. السياسات لازم تكون معروفة من الكل لضمان الالتزام بيها. إنشاء لجنة مشتركة بين المدرسة وأولياء الأمور: ممكن يتم إنشاء لجنة بتتكون من ممثلين عن المدرسين وأولياء الأمور لمناقشة المشاكل والقضايا المشتركة، دا بيتيح فرصة لحل النزاعات في بيئة متعاونة قبل ما تزيد. تعزيز دور المجتمع المدرسي: تعزيز دور المجتمع المدرسي اللي بيشمل الطالب، المدرسين، وأولياء الأمور في اتخاذ القرارات المدرسية، بحيث تحس كل الأطراف بمسؤولية مشتركة تجاه تحسين البيئة التعليمية؛ لتقليل الصدامات. تحسين وسائل التواصل الرقمي: استخدام منصات رقمية للتواصل بشكل فعال ومستمر بين المدرسة وأولياء الأمور. المنصات دي ممكن توفر تقارير منتظمة عن أداء الطالب وتتيح فرصة للحوار البناء. التركيز على الإيجابيات: تشجيع أولياء الأمور على التواصل مع المدرسين مش بس عند وجود مشاكل لكن كمان لما يشوفوا تحسن أو جهود إيجابية من المدرسين مع أولادهم. دا بيقوي العلاقة الإيجابية بينهم وبيساعد في تقليل التوتر.   ادخال نهج "المدرسة المفتوحة": عن طريق فتح أبواب المدرسة بشكل دوري لأولياء الأمور لحضور حصص دراسية أو المشاركة في أنشطة مدرسية؛ دا هيساعد في بناء فهم أحسن لجهود المدرسين ويقلل من سوء الفهم.   التقييم الذاتي المستمر: تشجيع المدرسين وأولياء الأمور على تقييم أدائهم وسلوكهم بشكل دوري، دا ممكن يساعد في تحسين طرق التعامل وتحقيق التفاهم المتبادل.   تعزيز بيئة الاحترام المتبادل:  من خلال نشر ثقافة احترام الآراء والتعامل باحترام داخل المدرسة وبين أولياء الأمور والمدرسين يتم تعزيز التعاون وتقليل الخلافات. تقدر المدرسة تنظم ندوات وورش عمل تركز على أهمية الاحترام في العملية التعليمية. ولأن العلاقة بين المدرسين وأولياء الأمور بتعتبر أساس مهم لنجاح العملية التعليمية؛ لازم يتم بناء جسر من الاحترام المتبادل والتفاهم للمساعدة في تحسين العلاقة واللي بالتالي هتنعكس بالإيجاب على الطلاب؛ لأن التعامل السئ مش هيأدي لحل المشاكل لكن بالعكس هيزود من تعقيدها فلازم نركز على التعاون لتحقيق أفضل النتائج الممكنة للطلاب أولياء الأمور والمدرسين حلقات مهمة جدًا في دايرة تربية المراهق وتنمية شخصيته، علشان كدا لازم تكون العلاقة بينهم صحية، قوية ومتناغمة. اعرف أكتر عن إزاي تقوي العلاقة دي وعن الطرق الصحية لتربية ابنك / بنتك المراهقين عن طريق أنك تحجز جلسة مع (إسراء صلاح)، أخصائي نفسي، وكاتبة المقال بسهولة وأمان من خلال موقع اسأل الالكتروني من هنا: https://esaal.me/ar/book-session/Esraa-Salah?catId=14   #وقت_الفصل #وقت_الفصل_من_الضغوطات #دعم_المراهقين #مرحلة_المراهقة   #أولياء_الأمور_والمدرسين   إقرأ المزيد

الاكتئاب لدى المراهقين

الاكتئاب لدى المراهقين كل إنسان بيمر في مرحلة أو مراحل معينة من حياته بحالة من الحزن، ودا شئ طبيعي جدًا، لكن لما تجتمع عدد من الأعراض المرتبطة بالحزن، الضيق، الهم، التشاؤم، الغم، اليأس، اضطرابات النوم، فقدان الطاقة، وتغير في الشهية وعدم الاهتمام بالأشخاص والأشياء، وقتها الإنسان بيصاب باضطراب الاكتئاب. وعلى عكس المعتقد سابقًا أن الأطفال والمراهقين مش بيمروا بحالات اكتئاب، في أدوات اتصممت مخصوص لقياس الاكتئاب عند الأطفال والمراهقين؛ لمعرفة كم المعاناة من اضطراب الاكتئاب المزعج، ومن المؤكد والمعروف أن فترة المراهقة بتعتبر من الفترات الحساسة المليانة بالتغيرات الهرمونية ولو تزامنت مع أعراض اكتئاب، بتمثل مشكلة حقيقية للمراهق وبيكون لازم مواجهة التحدي دا والرجوع بالمراهق لمرحلة نمو هادية بدون صراعات وإحباطات. وزي ما احنا عارفين، أن اكتئاب المراهقين بينبأ بحدوث مشاكل توافق في المستقبل وأن حدوث الاكتئاب في عمر مبكر بيزوّد من خطر الإصابة بفترات من الاكتئاب في المستقبل وبيزداد حدوث الاكتئاب عند المراهقين في حالات كتيرة منها اكتئاب أحد الوالدين، أو الأطفال لأباء منفصلين، والأطفال المصابة باضطراب فرط النشاط ونقص الانتباه، والأطفال الفقراء بالإضافة للمراهقين اللي بيواجهوا في حياتهم بعض الخبرات النفسية والاجتماعية اللي بتأدي للأحداث الحادة في الحياة زي الصحة السيئة، ومشكلات الأسرة، والنظام المدرسي، ونقص الرعاية من الوالدين. علماء كتير أضافوا نماذج وطرق للمساعدة على الخروج من اضطراب الاكتئاب عند المراهقين زي التركيز على كيفية تغيير المعتقدات والاتجاهات والطرق الغير تكيفية اللي بيتبناها المراهق، أو التأكيد على ضرورة التعديل المباشر للأفكار المغلوطة والسلبية وإزاي يتم استبدالها بأفكار تانية إيجابية، وتدخل العلاج الدوائي في حالة أن الاضطراب شديد ومزمن. وبيعتبر العلاج المعرفى السلوكى من أحسن الطرق المتاحة والمجربة لعلاج اكتئاب المراهقين؛ لأنه بيعلم المراهق الأسلوب السليم لحل المشاكل وبيدربه على المهارات الاجتماعية من خلال المناقشة والتدريب الموجه، زي مهارات تنمية بناء الثة بالنفس، كمان بيعلمه مواجهة الضغوطات النفسية وكيفية التعامل معها، بجانب إنه بيساعده على الإشتراك فى الأنشطة المبهجة اللى بتمده بالإحساس بالكفاءة والإنجاز، وبالتالي بيبني إنفعالات إيجابية وجوانب قوة ومعنى عند المراهق وصولًا للسعادة والحياة الطيبة. اكتئاب المراهقين من أصعب التحديات اللي ممكن تحصل خلال فترة المراهقة واللي بالفعل كلها تحديات لأن المراهق بيكون لسه مش فاهم الحياة بصورة كاملة.  لو شاكك في أي أعراض اكتئاب ظهرت على أولادك المراهقين، تقدر تحجز فورًا مع (إيمان مصطفى)، مرشد نفسي، بكل سهولة عن طريق موقع اسأل الالكتروني من هنا: https://esaal.me/ar/book-session/Eman-Ali-Mustafa?catId=14 علشان توصل بأولادك لبر الأمان وتعدي مرحلة المراهقة على خير. #وقت_الفصل #وقت_الفصل_من_الضغوطات #دعم_المراهقين #مرحلة_المراهقة #اكتئاب المراهقين إقرأ المزيد