لما يتم التحرش بطفل… مش بس جسمه بيتأذى، دي روحه اللي بتتكسر.

في أطفال كتير…اتعرضوا لأذى كبير، بس ولا حد فيهم قال الجملة دي: أنا اتأذيت، مش لأنهم ما تعبوش، ومش لأنهم نسيوا…لكن لأن الوجع اللي عاشوه كان أكبر من قدرتهم على الشرح. الطفل اللي اتعرض لتحرش أو عنف…مش دايمًا بيصرخ، ولا بيعيط، ولا بيحكي. أوقات كتير، الطفل بيختار "السكوت" مش ضعف… لكن لأن الخوف قفَل عليه الكلام.
لأن اللي أذاه كان حد بيحبّه … حد قريب، لطيف، محبوب، ولأن في جوّاه خجل، وذنب، وارتباك مش قادر يعبّر عنه.

التحرش الجنسي بالأطفال مش مجرد "واقعة". ومش مشهد في مسلسل بس لكن هو زلزال نفسي بيهز ثقة الطفل في نفسه، في الأمان، وفي العالم كله.
والمؤلم أكتر… إن ده غالبًا بيحصل على إيد شخص قريب، حد بيثق فيه، وبيتعامل معاه كل يوم.

شخصية يوسف في مسلسل لام شمسية أكبر دليل على كل مشاعر الخوف، الخجل، والحزن اللي بيمر بيهم أي طفل اتعرض للتحرش وعدم قدرته على الكلام أو مشاركة أهله في اللي حصل.

إيه اللي بيحصل جوه الطفل وقت التحرش؟

الدماغ الطفولية مش مهيّأة تفهم اللي بيحصل، فبيحصل خلل داخلي كبير بيترجم على صورة:

• ارتباك: "هو ده حب؟ ولا عقاب؟"
• ذنب: "أنا السبب؟ طب ليه ما قلتش؟"
• خجل: "أنا بقى فيّ حاجة وحشة؟"
• خوف: "لو اتكلمت، محدش هيصدقني… أو هيزعلوا مني"

كل ده بيخلي الطفل يكتم، ويسكت، ويعزِل نفسه وتبدأ تظهر عليه علامات اضطراب ما بعد الصدمة (PTSD).

إيه هو اضطراب ما بعد الصدمة عند الأطفال؟

 PTSD (Post-Traumatic Stress Disorder)هو اضطراب نفسي بيظهر بعد التعرض لحدث صادم، زي التحرش أو الاعتداء الجسدي أو النفسي.
وفي حالة الأطفال، التجربة بتكون مربكة أكتر… وأعراضها مش دايمًا واضحة.

الأعراض النفسية والسلوكية لاضطراب ما بعد الصدمة عند الأطفال.

1. كوابيس متكررة أو تبوّل لا إرادي
2. نوبات غضب أو بكاء مفاجئة
3. انعزال اجتماعي مفاجئ
4. عنف مفاجئ
5. رُعب من أشخاص أو أماكن معينة
6. رسم أو لعب فيه إيحاءات جنسية أو عنف
7. كلام متكرر عن الموت أو "الاختفاء"
8. تراجع في التحصيل الدراسي أو فقدان التركيز
9. خوف مفرط من لمس الجسد أو الكشف عند الدكتور

الأعراض دي مش شرط تظهر كلها… لكن حتى علامة واحدة منهم على طفلك، أكيد تستحق الانتباه.

طب ليه الطفل مش بيتكلم بسهولة؟

• الخوف من العقاب
• عدم فهم الموقف أو تقديره
• التهديد من المعتدي
• الشك في النفس
• عدم وجود بيئة آمنة للكلام
• إحساس بالعار
• ضعف اللغة أو المصطلحات للتعبير عن اللي حصل

هل في علاج حقيقي لاضطراب ما بعد الصدمة عند الأطفال؟

أكيد في، وبيبدأ من الاعتراف والاحتواء، مش التأنيب.

أهم خطوات العلاج:

1. الاستماع والتصديق:
   أهم خطوة نفسية هي إننا "نصدّق الطفل"، حتى لو القصة مش كاملة.

2.     التدخل النفسي المبكر:
عن طريق أخصائي نفسي للأطفال، ببرامج زي:

3.     العلاج باللعب

4. العلاج السلوكي المعرفي (CBT)
5. العلاج بالفن أو القصة
6. إعادة بناء الأمان:
   لازم الطفل يحس إن فيه مكان آمن، ناس بتحب من غير شرط، وأهل بيسمعوا ومش بيحكموا.
7. دعم الأسرة نفسيًا:
   لأن صدمة الطفل بتأثر على الأهل كمان، ومحتاجين يتعلموا إزاي يدعموه صح.
8. متابعة طويلة المدى:
   بعض الأطفال بيتحسنوا بسرعة، والبعض بياخد وقت أطول حسب مدى الصدمة، ودرجة الدعم.

دور المجتمع

• التوعية الجنسية المبكرة بطريقة مناسبة للعمر
• تعليم الأطفال حدود أجسامهم وحقهم في الخصوصية
• فتح الحوار بدون توتر أو تخويف
• مراقبة السلوكيات بدون تجسس
• إنشاء بيئات آمنة في المدارس، النوادي، والجمعيات

في النهاية، مهم نعرف أن الطفل مش هينسى، لكن ممكن يتعلّم يكمّل حياته لو لقى حضن آمن، ودعم حقيقي، وناس تصدّق وجعه.

التحرش مش غلطة بسيطة، دي جريمة بتسيب أثر مدى الحياة لو ما اتعالجتش.

لو شايف إن طفلك محتاج دعم، أو حتى أنت محتاج تفهم اللي بيحصل جواه، تقدر تتكلم مع أكبر الاستشاريين النفسيين على مدار 24 ساعة، ومن أي مكان. زور موقع اسأل، وخد أول خطوة للفهم والدعم. www.esaal.me